Қазақстанда кейбір азаматтар үшін несие төлемдерін кейінге қалдыру мәселесі енгізілуі мүмкін
Қазақстан Республикасының Қаржы нарығын реттеу және дамыту агенттігі әлеуметтік жағынан осал топтар (ӘЖОТ) мен төтенше жағдайдан зардап шеккендер үшін несие төлемдерін кейінге қалдыруды енгізуді ұсынды. Ведомствоның тиісті қаулы жобасы «Ашық НҚА» порталында жарияланды, деп хабарлайды Azattyq Rýhy.
«НҚА жобасы жеке тұлғалар, оның ішінде әлеуметтік жағынан осал топтар үшін проблемалық берешекті реттеу тетіктерінің тиімділігін арттыруға, сондай-ақ банктің/МИҚҰ-ның банк қарызы/микронесие шарттарына өзгерістер енгізу туралы қарыз алушылардың өтініштерін қарау кезінде әрекеттерінің ашықтығы мен бірізділігін қамтамасыз етуге бағытталған», – делінген құжат жобасында.
Атап айтқанда, түзетулер мынадай нормаларды көздейді:
- әлеуметтік жағынан осал топтар мен төтенше жағдайдан зардап шеккендер үшін төлемді кейінге қалдыруды енгізу;
- қарыз алушының (ӘЖОТ немесе ТЖ-дан зардап шеккен) кірісінің төмендеуі туралы растайтын құжаттар болған жағдайда, комиссияларсыз кемінде үш ай мерзімге кейінге қалдыру ұсыну міндетін белгілеу;
- берешекті өтеу мүмкін еместігіне әкелген өмірлік жағдайдың сипатына байланысты қарыз алушыдан құжаттар сұрату тәртібін нақтылау және осындай құжаттардың тізбесін қосымша түрінде енгізу.
Қаулы жобасы жеке тұлғалар, оның ішінде әлеуметтік жағынан осал топтар үшін проблемалық берешекті реттеу тетіктерінің тиімділігін арттыруға, сондай-ақ банктің/микроқаржы ұйымының банк қарызы/микрокредит шарттарына өзгерістер енгізу туралы қарыз алушылардың өтініштерін қарау кезіндегі әрекеттерінің ашықтығы мен бірізділігін қамтамасыз етуге бағытталған.
