Қазақстанда электронды цифрлық қолтаңбаны алу тәртібі өзгереді: енді тек онлайн

Жаңа жүйе дербес деректердің қауіпсіздігін күшейтеді

Бұл өзгеріс азаматтардың жеке деректерін қорғау деңгейін арттыруға және бөгде адамдардың ЭЦҚ алуын болдырмауға бағытталған.

Бұған дейін ЭЦҚ-ны eGov.kz порталы арқылы да, ХҚКО-да да алуға болатын. Енді тек онлайн рәсімделеді.

ЭЦҚ-ны онлайн алу жолы:

1. egov.kz немесе pki.gov.kz порталына кіріңіз;
2. Онлайн өтінімді толтырыңыз;
3. Биометриялық сәйкестендіруден өтіңіз – жүйе камера арқылы бет-әлпетіңізді таниды;
4. Жүйе сізді сәтті таныған жағдайда, ЭЦҚ бірден беріледі – ХҚКО-ға барудың қажеті жоқ.

Егер жүйе сізді танымаса не болады?

• Жүйе 5 ретке дейін биометриялық тексеруден өтуге мүмкіндік береді.
• Егер барлық әрекет сәтсіз аяқталса, тек сол кезде ғана ХҚКО-ға жүгінуге рұқсат беріледі.
• Бұл шектеу – ЭЦҚ-ны бөгде адамның заңсыз алуын болдырмауға бағытталған.

ХҚКО-да операторға жүгіну үшін не қажет?

• Ең алдымен биометриядан 5 рет сәтсіз өтуіңіз керек.
• ХҚКО операторы ЖСН арқылы тексеріс жүргізеді және тек осы жағдайда ғана өтінім қабылдай алады.
• Биометриялық растаусыз ХҚКО арқылы ЭЦҚ рәсімдеу мүмкін емес.

Компьютері немесе интернеті жоқ азаматтарға арнайы мүмкіндік бар

Интернетке қолжетімділігі жоқ азаматтар үшін ХҚКО-ның өзіне-өзі қызмет көрсету аймақтарында биометриялық сәйкестендіруден өту мүмкіндігі жасалған. Егер сәйкестендіру сәтті өтсе, операторсыз-ақ ЭЦҚ кілті онлайн беріледі.

ЭЦҚ-ның 92%-ы қашықтан рәсімделген

2025 жылдың басынан бері Қазақстанда 14,9 миллионнан астам ЭЦҚ кілті берілген, оның ішінде:

• 92,25%-ы – қашықтан сәйкестендіру арқылы;
• 7,75%-ы – ХҚКО арқылы.

Бұл көрсеткіштер қазақстандықтардың цифрлық қызметтерге белсенді бейімделіп жатқанын дәлелдейді.

Биометрия – ЭЦҚ қауіпсіздігінің басты кепілі

ЭЦҚ – қолмен қойылған қолтаңбамен тең заңды күшке ие. Сондықтан оны тек иесінің өзі ғана алуы тиіс. Биометрия технологиясы арқылы ЭЦҚ кілттерін бөгде адамның заңсыз иеленуіне тосқауыл қойылады.