«Олар қоңырау шалмаған адам қалмаған шығар»: Қошанов шұғыл түрде алаяқтарға қарсы жаңа заң әзірлеуді тапсырды

Осылайша заң шығарушы орган алаяқтардың ғана емес, оған ықпал ететін мобильді оператор, қаржы ұйымдарының қызметкерлері мен дропперлердің де жазасын қатаңдатпақ.

«Бүгін талқыланған негізгі тақырып – кибералаяқтық мәселесі болды. Ол түсінікті де. Соңғы уақытта цифрлық ортадағы қылмыстардың ауқымы да, одан туындайтын қауіп-қатер де едәуір артып келеді. Бүгін сөз сөйлеген депутаттар өте орынды мәселе көтеріп отыр.Бірақ біз кінәліні ғана іздемей, мәселенің шешу жолын қарастыруымыз керек. Қазір кибералаяқтар қоңырау шалмаған немесе күмәнді хабарлама жібермеген адам қалмаған шығар. Мұндай келеңсіз үрдіс тек Қазақстанды ғана емес,  бүкіл әлемді жаулап алды», — дейді Қошанов.

Мәжіліс пикері бұл мәселеге қатысты президенттің тапсырмаларын атай отырып, алаяқтыққа қарсы күрес жүріп жатса да киберқылмыс толастамай тұрғанын атап өтті.

«Сондықтан бүгінгі күні киберкеңістікте жауапкершілікті одан әрі күшейту маңызды. Кибершабуылдардың басым бөлігі шетелден келетіні және трансұлттық сипатта болатыны түсінікті. Бірақ бұл жерде жауапкершілік осы тізбектің барлық қатысушыларына бірдей қарастырылуы керек. Яғни, алаяқтық схемаларды ұйымдастырушылар ғана емес, оған ықпал ететіндер де қатаң жауапқа тартылуға тиіс. Ол – мобильді операторлар, қаржы ұйымдарының қызметкерлері, дропперлер және басқа да қатысушылар», — дейді ол.

Бұл ретте Мәжіліс спикері бұған дейін де елімізде қатты ушыққан мәселелер жаңа заңдардың арқасында тежелгенін айта келе киберқылмысқа қарсы да жаңа заң қабылдайтын уақыт жеткенін айтты.

«Осыған ұқсас мәселелер бұған дейін де шешімін тапты ғой. Естеріңізде болса, кезінде мал ұрлығы ел арасында дүрбелең туғызды. Броконьерлер мәселесі ушығып тұрған болатын. Біз әрқайсысы бойынша жекелеген нормалар қабылдап, қылмыстық жауапкершілікті күшейттік. Сол арқылы аталған мәселелерге тосқауыл қойдық. Қыз ұрлау да – ушыққан мәселе. Депутаттар көтеріп, ол мәселе бойынша да заңды қатайтуды қарастырып жатырмыз.  Енді, міне, кибералаяқтықпен де күресті күшейтіп, қылмыстық жауапкершілікті барынша қатаңдатуға тиіспіз. Заңды күшейтпей, халыққа қолайсыздық туғызып отырған алаяқтардың әрекетін тоқтату мүмкін емес. Сондықтан тиісті комитетке шұғыл түрде тиісті заң жобасын дайындауды тапсырамын», — деді ол.

Қошанов сөз соңында жаңа құжатты әзірлеуге бүгін кибералаяқтық туралы сөз сөйлеген депутаттар да атсалысады деген ойын жеткізді.