Маңғыстаудағы сарбаздың өлімі: сот отырысы дау-дамаймен басталды (ВИДЕО)

МӘН-ЖАЙ

19 жастағы сарбаз Маңғыстау облысында командирі оқ атып, қаза тапқан. Айыпталушы – 22 жастағы Дамир Досов, ол – Ақтау гарнизоны 25744 әскери бөлімінің зениттік-артиллериялық взвод командирі.

АТА-АНАЛАР АДВОКАТСЫЗ КЕЛГЕН

Сот отырысы алдында Ulysmedia.kz журналисі марқұм Марат Барқұловтың ата-анасы Ербол мен Әсияны жолықтырды. Олар сотқа адвокатсыз келгендерін айтты.

— Бүгін бірінші отырыс. Бізде адвокат жоқ. Судьядан отырысты кейінге шегеруді сұраған едік, адвокаттың кестесі тығыз болғандықтан қатыса алмады. Бірақ судья біздің өтінішімізді қабылдамады. Бүгін біз адвокатсыз келдік, – деді Ербол Барқұлов.

“ӘДІЛ ҮКІМ ШЫҒАДЫ ДЕП СЕНЕМІН”

Марқұм сарбаздың анасы Әсия Барқұлова сот әділ өтеді деп сенетінін айтты:

— Мен әділ үкімді күтемін. Мұндай офицерлер біздің жағдайымыздан сабақ алып, өз жұмыстарына жауапкершілікпен қарауы керек. Әскер керек, бірақ осындай офицерлердің кесірінен ата-аналар балаларын жіберуге қорқады. Егер біздің іс бойынша айыпталушы қатаң жаза алса, әскерде тәртіп орнайды деп ойлаймын.

САРБАЗ ӘСКЕРДЕ ҚЫЗМЕТ ЕТУДІ АРМАНДАҒАН

Әсияның айтуынша, ұлы әскерде қызмет етуді мақтан тұтқан:

— Біздің балаларымыз ерікті түрде әскерге барады. Менің ұлым СОБР сарбазы болуды, қара берет киіп, абыроймен оралуды армандады ғой.

ӨЗГЕ АТА-АНАЛАРДЫҢ ҚОЛДАУЫ

Сотқа басқа да сарбаздардың ата-аналары келіп, қолдау көрсетті. Олардың бірі – 2023 жылдың 21 желтоқсанында Жаркентте қаза тапқан Әмір Байтурғановтың әкесі Мұрат Байтурғанов.

— Ұлым 3 ай ғана қызмет етіп, әскери бөлімнің немқұрайдығы салдарынан қаза тапты. Бүгін мен Ербол мен Әсияны қолдау үшін келдім. Біздің қайғымыз ортақ, – деді ол.

БҰҒАН ДЕЙІН

7 қыркүйекте «Оймаш» полигонында 19 жастағы Марат Барқұловтың рұқсатсыз атылған оқтан қаза тапқаны белгілі. 10 қыркүйекте марқұм Шығыс Қазақстан облысы Самар ауылында жерленді. 14 желтоқсанда адвокат тергеу барысында көптеген заңбұзушылық болғанын хабарлады.