Маңғыстау облысында мұнай компаниясы жыл басынан бері қызметкерлеріне жалақы төлемей отыр
«Mangystau Oil Refining» ЖШС жұмысшылары 2025 жылдың қаңтарынан бастап жалақыларын толық ала алмай отыр. Компания қызметкерлерінің айтуынша басшылық өз өнімдеріне тұтынушылардың жоқтығын айтып отыр. Бұл туралы Azattyq Rýhy агенттігі Lada.kz-ке сілтеме жасап хабарлайды.
«Mangystau Oil Refining» ЖШС компаниясы 2017 жылы құрылған. Кәсіпорынның негізгі қызметі қара және ашық түсті мұнай өнімдерін өндіру үшін мұнайды алу, сақтау және өңдеу болып саналады.
Жалақысын ала алмай отырған ұжым қазіргі жағдайға шыдамы таусылып бара жатқанын айтып отыр. Өйткені компания жұмысшылардың ақысы төленбегеніне қарамастан шетелдік азаматтарды жұмысқа шақырып жатқан көрінеді.
«Біз, «Mangystau Oil Refining» кәсіпорнының қызметкерлері, кәсіпорындағы қалыптасқан жағдайға байланысты арыз жазуға мәжбүрміз. Бізге белгілі болғандай, жұмыс берушінің қателігінен туындаған жалақыны төлеу мерзімі бірнеше ай бойы кешіктіріліп жатыр.
Қаңтар айында бізге небәрі 240 000 теңге төледі. Қаңтар айының қалған жалақысы, ақпан мен наурыз айларының жалақысы әлі күнге дейін төленбеген. Сондай-ақ, еңбек демалысында жүрген қызметкерлер өздеріне тиесілі демалыс ақысын алмаған. Жұмыстан шыққандардың соңғы төлемдері де төленбеген – олар ақшасын бір айдан бері күтіп отыр. Бұл еңбек заңнамасын өрескел бұзу деп есептейміз.
Қызметкерлердің көпшілігінің отбасы мен балалары бар. Жағдайдың тез арада шешілуіне шыдамдылық таныттық, бірақ әзірге еш өзгеріс болған жоқ.
Әсіресе, жұмысшыларға ақы төленбегеніне қарамастан, 100-ден астам шетелдік мамандардың жұмысқа орналасқаны, олар үшін компания барлық жағдайды – жолақысын, тамақ және жатын орнын толығымен төлеп бергені рас. Отандық қызметкерлер ақшасыз қалса да оларға жайлылық толықтай жасалған.
Ұжымдық өтініштеріміз бен басшылықпен келіссөздер жүргізгенімізге қарамастан, жағдай шешілмей отыр. Оның үстіне, диалог пен ымыраға келудің орнына талап қойған жекелеген қызметкерлер қысымға ұшырап, жұмыстан шығарамыз деп қорқытады.
Бұл үндеу тыңдалады деген үміттеміз және кәсіпорын басшылығын еңбек заңнамасы мен әділет нормаларына сәйкес мән-жайларды шешу үшін шаралар қабылдауға шақырамыз», — деді олар.
Үндеу соңында мұнайшылар бірнеше талаптар қойды: өткен айлардағы барлық төленбеген жалақыны төлеу және қаңтар айының соңында шыққан жалақыны 24 пайызға төмендету туралы бұйрықтың күшін жою.
Сонымен қатар, олар ҚР Еңбек кодексінің 113-бабының 3-тармағына сәйкес төлемді кешіктірген күндері үшін өсімпұлды әр күн үшін 1,25 пайыз көлемінде есептеуді сұрайды.
