LRT жыры: Талғат Арданның қайда жүргенін интерпол да білмейді

Бас прокурордың орынбасары Әсет Шындалиев Астанадағы LRT құрылысы кезінде қаржы жымқырды деген айыппен сотталғандарды құқық қорғау органдары неге Қазақстанға қайтара алмайтынын түсіндіруге тырысты, деп хабарлайды Ulysmedia.kz.
Шенеуніктің мәліметінше, Интерпол «Астана LRT» жауапкершілігі шектеулі серіктестігінің бұрынғы басқарма төрағасы Талғат Ардан мен астана әкімінің бұрынғы орынбасары Қанат Сұлтанбековті іздестіріп жатыр.
— Іздеудің бірнеше түрі бар. Біздің құқық қорғау органдарымыз көбіне мемлекеттік ішіндегі іздеу жұмыстарымен айналысады. Ал халықаралық іздеумен интерпол айналысады. Біз сәйкесінше интерполға тапсырма береміз, олар сонымен айналысады, дейді Шындалиев.
Оның сөзінше, интерпол әзірге сырттай сотталғандар қай елдерде екенін анықтай алған жоқ, сондықтан оларды Қазақстанға экстрадициялау мүмкін болмай отыр. Журналистер Талғат Ардан мен Қанат Сұлтанбековтың әлеуметтік желіде бейнероликтер жариялап жатқанын атап өтті.
— Экстрадициялау үшін интерпол ол адамдардың нақты қайда жүргенін анықтауы керек. Содан кейін экстрадициялық қамауға алуымыз мүмкін. Әзірге интерпол тарапынан олардың қайда жүргені туралы нақты ақпарат жоқ, дейді бас прокурордың орынбасары.
LRT ҚҰРЫЛЫСЫ
Елордада жеңіл рельсті жобаның құрылысы 2011 жылы басталғанымен, әлі пайдалануға берілмеген. Бүгінгі күні LRT эстакадасының арқалықтарын төсеу кезеңі аяқталған. Cтансалардың негізгі темірбетон конструкциялары құрылысын 2024 жылдың соңына дейін аяқтау жоспарланып отыр. Келесі жылы рельстерді төсеу, стансаларды әрлеу және жылжымалы құрамдарды жеткізетін депо құрылысын жүргізу, Қабанбай батыр даңғылы мен Қалдаяқов көшесі бойындағы эстакадалық бөлікті абаттандыру жүргізіледі.
Жеңіл рельсті желінің жалпы ұзындығы 22,4 км құрайды. LRT құрамына 18 станса кіреді. 652 адам сыятын 19 жылжымалы құрамды іске қосу жоспарлануда. Қозғалыс аралығы 4-5 минутты құрайды. Бастапқы кезеңде тәулігіне 25 мың адам жолаушылар ағыны күтіледі, бұл ретте жолаушылар ағыны ең жоғары уақытта тәулігіне 92 мың адамға жетуі мүмкін. Төлем жүйесі қалалық аналогы бойынша, көлік картасын валидациялау немесе QR-код арқылы төлеу арқылы қарастырылған. «City Transportation Systems» ЖШС басқарма төрағасы Асылбек Дүйсебаевтың айтуынша, барлық құрылыс жұмыстарын аяқтап, LRT-ны іске қосу 2025 жылдың соңына жоспарланған. Пилотсыз пойыздарды сынақтан өткізу үшін қосымша 6 ай қажет.