Жоспар бойынша эвакуация: Қазақстан мектептерінің ықтимал төтенше жағдайларға дайындығы тексерілді
2025 жылдың 2 сәуірінде бүкіл Қазақстанда SAQ жобасына қатысатын барлық мектептерде эвакуация бойынша республикалық оқу-жаттығулары өтті. Ауқымды іс-шара эвакуация алгоритмдерін іс жүзінде қолдануға, қауіпсіздік мәдениетін насихаттауға және оқушылардың, мұғалімдердің және білім беру ұйымдары әкімшілігінің табиғи және техногендік сипаттағы төтенше жағдайларға дайындық деңгейін арттыруға бағытталды.
SAQ жобасын Ұлттық волонтерлер желісі ҚР Оқу—ағарту министрлігінің және ҚР Төтенше жағдайлар министрлігінің қолдауымен «Caravan of Knowledge» Корпоративтік қорымен және «Шеврон» компаниясымен серіктестікте бірлесіп жүзеге асырады.
Оқу-жаттығуларға Қазақстанның барлық өңірлерінде 200-ге жуық мектеп, сондай-ақ өңірлік төтенше жағдайлар департаменттері (ТЖД), тиісті министрліктер мен білім ведомстволарының өкілдері қатысты. Сейсмикалық қауіпті аймақтарда – Алматы, Шымкент қалаларында, Алматы, Шығыс Қазақстан, Жамбыл, Қызылорда, Түркістан, Абай және Жетісу облыстарында – эвакуация сейсмикалық жаттығу форматында, ал қалған өңірлерде өрт шыққан жағдайдағы эвакуация түрінде жүргізілді.
Мұғалімдер мен оқушылардың практикалық дайындығы
2024 жылдың шілде айынан бастап SAQ жобасы аясында мұғалімдер мен оқушылардың ықтимал төтенше жағдайларға дайындығын арттыру бойынша шаралар кешені жүргізіліп келеді. Жобаға қатысушы мұғалімдер жетекші қауіпсіздік сарапшылары өткізген онлайн және офлайн оқуға қатысты, тест тапсырды және өз мектептерінде әрекет ету алгоритмдерін іс жүзінде қолданып көрді. Абай, Атырау және Қостанай облыстарының SAQ мұғалім-офицерлері өз мектептерінде үлгілік эвакуация жүргізіп, трансляция жасады.
Сарапшылардың пікірі
Сарапшылардың айтуынша, мұндай оқу-жаттығуларды өткізу оқушылардың төтенше жағдайларда қауіпсіз әрекет ету дағдыларын қалыптастыруда басты рөл атқарады.
«Оқушылар арасында қауіпсіздік мәдениетін дамыту – білім жүйесінің басым міндеті. Жалпы орта білім берудің мемлекеттік жалпыға міндетті стандарты аясында тіршілік қауіпсіздігі негіздері тақырыптары білім берудің барлық деңгейлерін – бастауыш сыныптан жоғары сыныптарға дейін қамтиды. «Тіршілік қауіпсіздігі» курсын негізгі оқу пәндеріне кіріктіру балаларға тек теориялық білім беріп қана қоймай, төтенше жағдайларда өмір мен денсаулықты сақтауға қажетті практикалық дағдыларды қалыптастыруға мүмкіндік береді. SAQ жобасы аясындағы ауқымды республикалық оқу-жаттығулар – мектептердің төтенше жағдайларға нақты дайындығын арттыру және жалпы қоғамда қауіпсіздік мәдениетін нығайту жолындағы маңызды қадам», – деп атап өтті Шахидулла Датбек Маратұлы, Қазақстан Республикасы Оқу—ағарту министрлігінің Орта білім беру комитетінің бас сарапшысы.
«Білім мен қауіпсіздікке инвестиция сала отырып, Қазақстанның болашағына инвестиция саламыз. SAQ жобасы – өскелең ұрпақтың өмірі мен денсаулығын қорғауға бағытталған табысты серіктестіктің үлгісі», – деп өз кезегінде қауіпсіздік саласындағы ынтымақтастықтың маңыздылығын атап өтті Лейла Айтмұханова, «Шеврон» компаниясының әлеуметтік инвестициялар жөніндегі кеңесшісі.
Қауіпсіздік – әркім үшін басымдық
Республикалық оқу-жаттығулар SAQ жобасының қорытынды кезеңі болды және білім мекемелерінің төтенше жағдайларға дайындығының жоғары деңгейін көрсетті. Ұйымдастырушылар қауіпсіз мінез-құлық мәдениетін қалыптастыру балалардың және бүкіл елдің болашағы тәуелді болатын ортақ міндет екенін атап өтті.
«SAQ жобасының келесі кезеңі Қазақстанның оңтүстігіне – жер сілкінісі қаупі жоғары Алматы, Жамбыл және Түркістан облыстарына кеңейту болады. 2025 жылдың жазында мектептердің төтенше жағдайларға дайын болуын қамтамасыз ету үшін мұғалімдер мен оқушыларды оқытуды бастаймыз. Төтенше жағдайлар абстракция емес, нақты өмірдің бір бөлігі болып табылатын жерлерде мұғалімдердің жобаға қызығушылығы аса жоғары. Сонымен қатар жаңа мектептерді қоса отырып, пилоттық аймақтарда жұмысты әрі қарай жалғастырамыз. Біздің мақсатымыз SAQ жобасын бүкіл елде білім беру бағдарламаларына енгізу үшін Оқу-ағарту министрлігіне әдістемелік ұсыныстар беру болып табылады», – деп атап өтті Дарын Сайынов, «Caravan of Knowledge» басқарушы директоры.
Жоба бастамашылары мүдделі тараптарды бастаманы ақпарат жағынан қолдауға және қоғам мен білім қауымдастығының назарын табиғи және техногендік сипаттағы төтенше жағдайлар кезінде білім мекемелерінде қауіпсіз мінез-құлық мәдениетін дамытудың маңыздылығына аударуға шақырады.
Толық ақпарат сайтта және Instagram парақшасында
Анықтама үшін:
«Шеврон» – әлемдегі жетекші интеграцияланған энергетика компанияларының бірі. Біз сенімді, қолжетімді және таза энергия прогресс үшін маңызды деп есептейміз. «Шеврон» мұнай және табиғи газ өндірумен, жанар-жағармай, мұнай-химия өнімдерін және қоспаларды өндірумен айналысады, сондай-ақ бизнес пен өнеркәсіпті дамыту үшін технологиялар жасап шығарады. Біз мұнай және газ саласындағы бизнесімізді дамытуды, жұмысымыздың көміртегі қарқындылығын азайтуды, жаңғырмалы отын өндірісі, көміртекті қармау, оффсеттерді, сутегі және басқа да инновациялық технологияларды пайдалану сияқты төмен көміртекті бизнес бағыттарын дамытуды мақсат тұтамыз. «Шеврон» компаниясы туралы қосымша ақпаратты www.chevron.com сайтынан таба аласыздар.
«Caravan of Knowledge» Корпоративтік қоры – Қазақстанда STEAM білімін насихаттайтын, мұғалімдердің біліктілігін арттыратын және мектеп оқушыларын оқытатын білім беру ұйымы.
«Ұлттық волонтерлік желі» (ҰВЖ) ЗТБ – азаматтардың, азаматтық қоғам институттарының, бизнес секторының және мемлекеттік құрылымдардың арасында волонтерлік мәдениетті, волонтерлік бастамалар мен қызметті қалыптастыру, қолдау және дамыту мақсатында 2010 жылы құрылған азаматтар мен заңды тұлғалардың ерікті бірлестігі.
