Иран билігі қоғамдық қарсылықтан кейін хиджаб мәселесінде аяқ тартты
Иранда хиджаб туралы заңға байланысты үкімет ішінде дау шықты, деп хабарлайды Ulysmedia.kz.
МӘН-ЖАЙЫ
Парламент қабылдаған жаңа заң әйелдерге хиджаб кию талаптарын күшейтіп, оны бұзғандарға қатаң жазалар тағайындайды. Алайда Иран президенті Масуд Пезешкиан бұл заңға вето қойды, себебі оның қоғамда жаңа толқулар тудыруы мүмкін екенін айтты.
Иранның Hamshari басылымының мәліметінше, президент бұл мәселені Ирандағы негізгі шешімдер қабылдайтын орган – Ұлттық қауіпсіздік жөніндегі жоғарғы кеңеске жіберген. Бұл қадам заңның кейбір баптарының жойылуына әкелуі мүмкін. Жаңа заңда ірі айыппұлдар, шетелге шығуға тыйым салу және мүлікті тәркілеу секілді қатаң шаралар қарастырылған, әсіресе танымал тұлғалар үшін.
МУЗЫКАНТТЫҢ ОҚИҒАСЫ
Жақында ирандық музыкант Парасту Ахмадидің хиджабсыз өнер көрсетіп, оны YouTube-қа жариялаған оқиғасы қоғамда үлкен талқыға түсті. Оны және топ мүшелерін «ислам нормаларын бұзды» деген айыппен қамауға алған, бірақ көп ұзамай босатқан.
Қоғамдық қысым мен үкіметтегі келіспеушіліктерге байланысты заңның қабылдануы уақытша тоқтатылды. Қатаң жаза қаупіне қарамастан, Иранның ірі қалаларындағы көптеген әйелдер хиджаб кию міндеттілігіне ашық қарсылық білдіруде.
