«Дикий» Арман мен Қайрат Құдайбергеннің ісі жабық түрде өтетін болды

Алматы қалалық сотының баспасөз қызметінен мәлім еткендей, сотқа қатысушылардың қауіпсіздігі мақсатында қылмыстық істі қарау жабық форматқа ауыстырылды.

Сотталушылардың жалпы саны – 45 адам.

«Оларға «Билігін немесе лауазымдық өкілеттігін асыра пайдалану» (Қылмыстық кодекстің 362-бабы), ұйымдасқан қылмыстық топ құру, оған басшылық ету және оған қатысу (ҚК-нің 262-бабы), қарақшылық шабуыл (ҚК-нің 191-бабы), заңсыз бас бостандығынан айыру (ҚК-нің 126-бабы), 2022 жылғы Қаңтардағы жаппай тәртіпсіздіктерді ұйымдастыру және оларға қатысу (ҚК-нің 272-бабы), бандитизм (ҚК-нің 268-бабы) бойынша айыптар тағылды», – делінген хабарламада.

Атап өтілгендей, отырыс барысында процеске қатысушылардан сотталушыларға қатысты бұлтартпау шарасын өзгерту және жою, қылмыстық істі қайтару және тоқтату, жақын туыстарын қорғаушы ретінде тану туралы жүзден астам өтінішхат түскен.

«Сондай-ақ іс бойынша 10 жәбірленуші, 1 куәгер және 1 сотталушы сот отырысын жабық түрде өткізуді сұрады. Олар өз өмірлері, отбасылары мен жақындарының қауіпсіздігі үшін қауіптенетінін білдірді. Бұл өтініштерді сот қанағаттандырды», – деп түсіндірді сот өкілдері.

Басты сот отырысы осы жылдың 6 қазанына белгіленді.

Айта кетейік, мәслихаттың экс-депутаты Қайрат Құдайберген мен Арман Жұмагелдиевке («Дикий» Арман) қатысты сот процесі 14 қыркүйек күні Алматы маңындағы №72 түзеу мекемесінің тергеу изоляторында басталған болатын.

Кейін сот процесіне адвокаттардың кіруіне кедергі келтіріліп жатқаны туралы ақпарат тарады.

«Дикий» Арман былтыр Қаңтар оқиғасынан кейін ұсталған болатын. Кейін Бас прокуратура оның Ұлттық қауіпсіздік қызметінің тергеу изоляторында отырғанын мәлім етті.

Ал Қайрат Құдайбергеннің ұсталғаны туралы ақпарат 2022 жылдың 22 сәуірінде пайда болды.

Қайрат Құдайберген мен «Дикий» Арманға Қаңтар оқиғасы кезінде адам жинауды ұйымдастырды деген айып тағылып отыр.