Бағдат Мусин елімізде «суперЦОНдар» пайда болатынын айтты
Министр бір орталықтан барлық қызметті алуға болады дейді
![](https://matritca.kz/wp-content/uploads/2023/01/cce694b0-e91d-4663-b00b-b2948fe3deb0-780x470.jpeg)
ҚР Цифрлық даму, инновациялар және аэроғарыш өнеркәсібі министрлігінің кеңейтілген алқа отырысында министр Бағдат Мусин бірыңғай кеңістікте қызметтің барлық түрін алу енгізілетінін айтты, деп хабарлайды Azattyq Ruhy.
«Біздің стратегиялық міндетіміз — әрбір өмірлік жағдайды талдау, азаматтың нені бастан өткеретінін түсіну, кедергілерді жою және бәрін ыңғайлы әрі түсінікті процеске көшіру. Ол үшін фокус-топтар жиналып, нақты мемлекеттік органдар, CDO, басқа ұйымдар тартылады. Бизнес-процестерді қайта қарағаннан кейін оларды проактивті қызметтерге барынша ауыстыру жоспарлануда», — деді Бағдат Мусин.
Сондай-ақ, министр өз сөзінде ХҚКО-ның сервистік қызметтерін оңтайландыру бойынша жұмыстар жалғасып жатқанын атап өтті.
«Қазір Қазақстанда 324 орталық бар, өткен жылы оның 14-і жаңғыртылды, биыл тағы 50-ін жаңарту жұмысы жоспарланып отыр. Таяу болашақта елімізде барлық ұйым орналасқан және қазақстандықтар мемлекетпен өзара іс-қимыл жасай алатын және қызметтерді бір жерден ала алатын азаматтарға ыңғайлы және сапалы қызмет көрсетуге арналған бірыңғай кеңістік – «СуперЦОНдар» пайда болады», — деді ол.