#АуылФутбол жобасы жаңа Лига құрды
#АуылФутбол жобасы аясында #АуылФутболҮміт жаңа фестиваль-лигасы құрылды. Бұл туралы жоба жетекшісі, қоғам белсендісі Серік Мәмбетов мәлімдеді.
Оның айтуынша, #АуылФутболҮміт фестиваль-лигасы тек #АуылФутбол жобасына қатысушы командаларға жаңадан келген балалар үшін құрылған.
«Көбінесе балалар командаларының жаттықтырушылары бірнеше жыл бойы дайындалған балаларды жарыстарға апарады. Әрине, бәрі жеңіске жетуді қалайды! Бірақ балалардың үлкен тобы — жаңадан бастағандар, бәрінен де үлгермеген балалар — олар жаттықтырушылар назарынсыз және дұрыс ойын тәжірибесінсіз қалады. Ал ойын тәжірибесінсіз футбол ойнауды үйрену мүмкін емес. Сондықтан, осы балалар үшін #АуылФутболҮміт лигамызды құрдық. Лига тәжірибе ретінде болғандықтан Алматы облысының аумағында өтеді. Ал келесі жылы тағы бірқатар облыстар қосылады деп сенеміз», – дейді Серік Мәмбетов.
Бұл жерде балалардың өздері үшін де, ата-аналар үшін де мотивациялық құрамдас бөлік болмақ. Жарыс фестиваль-лига деп аталуының себебі онда спорттық-жарыс және мәдени-танымдық бөлім болады.
«Жарыстар әрқашан балаларды ғана емес, ата-аналарды да қызықтырады. Барлығы болмаса да, ата-аналардың көпшілігі баласының жетістікке жеткенін көргісі келеді. Ал ол үшін клубта өз арасындағы ойындар ғана емес, көршілес ауылдар мен облыстарға саяхаттар да қажет. Бұл жаңа танысулар мен жаңа жағымды әсерге алып келеді. Ал жалпы 7-10 жастағы балалар өз ауылынан 5-10 шақырым жерде орналасқан жерді білуі керек», — деп қосты С.Мәмбетов.
Фестиваль лигалары 3 жас категориясы бойынша өтеді. Бұл 2011-2013 және 2014-2015 жылдары туылған, сондай-ақ 2016 және одан кіші жастағы балалар. Ойындар шағын турнирлерді өткізуге қолайлы әртүрлі жерлерде өтеді.
Сонымен қатар, Лигалардағы ойындар бірнеше кезеңде – 2-3 ай сайын өткізіліп, командалар балалардың техникалық сипаттамаларын жақсартып, дайындалуға мүмкіндік алады.
«Жыл соңында ойындардың қорытындысы бойынша Лиганың жеңімпаздары мен жүлдегерлері анықталады. Біз Лиганың барлық қатысушыларын марапаттаймыз ешкім қараусыз қалмайды. Алматы облысының 20-дан астам ауылынан 1000-ға жуық бала қатысады деп болжап отырмыз. Осыған байланысты біз Лиганың әлеуетті демеушілерін шақырамыз, оларға ынтымақтастықтың қызықты және тиімді шарттарын ұсынатын боламыз», — деп түйіндеді сөзін С.Мәмбетов.
#АуылФутбол жобасы туралы ақпарат:
#АуылФутбол жобасы 2020 жылдың қаңтарында іске қосылды. Идея авторы – журналист және қоғам қайраткері Серік Мәмбетов. Бүгінде бұл «Арман ауыл» қорының зәкірлік жобасы.
Жоба қызметінің 4 жылы ішінде бірқатар жобалар жүзеге асырылды:
Қарасай ауданындағы Райымбек және Абай ауылдарында, Алматы облысының Ащыбұлақ, Көксай, Іргелі ауылдарында, сондай-ақ Қызылорда облысының Төребай ауылында жаңа клубтар құрылды.
Алматы және Ақтөбе облыстарында 2 футбол алаңы салынды.
«Кішігірім істер саясаты» аясында балалар ұжымдарын қолдау бағдарламасы іске қосылды: 180-нен астам балалар ұжымы оқу-жаттығу жабдықтары, формалар, доптар алды.
Әртүрлі кіші жобаларға бірқатар демеушілер тартылды; 35-тен астам турнир өткізілді, оның ішінде 6 республикалық; Ауылдық командалардың жаттықтырушыларына 30-дан астам семинарлар өткізілді;
«Futbol Week End» атауымен 3 іс-шара өткізілді, оның бағдарламасына спорттық жарыстар, мәдени-танымдық және білім беру іс-шаралары кірді;
Үлкендер мен ата-аналардың футболға деген қызығушылығын арттыру мақсатында «Отбасы және футбол» 2 фестивалі өткізілді;
Жобаның қатысушыларының саны 100 командадан асады, олар әртүрлі жарыстардың, соның ішінде халықаралық жарыстардың тұрақты қатысушылары. Мәселен, Маңғыстаудың «Ақшұқыр» командасы Қазақстан чемпионы және Қырғызстанда өткен халықаралық турнирдің жеңімпазы. Қатысушылар саны артып келеді.
#АуылФутбол жобасы еліміздің 14 облысында жұмыс істейді — бұл Алматы, Жетісу, Шығыс Қазақстан, Ақтөбе, Түркістан, Жамбыл, Ақмола, Қостанай, Қызылорда, Маңғыстау, Батыс Қазақстан, Павлодар, Жетісу және Солтүстік Қазақстан облыстары.
Қазіргі таңда «Халық» Қайырымдылық Қорымен серіктестікте 10 айлық жоба жүзеге асырылуда, оның аясында
— 100 ауылдық командаға құрал-жабдықтар мен футбол формасы түрінде қаржылай көмек көрсетілді;
— 100 ауылдық жаттықтырушы Қазақстан Футбол Федерациясының базасында УЕФА Grassroots Leaders Certificate «D» санатындағы жаттықтырушылар курсы бойынша оқытылды;
– 2024 жылдың сәуір-қазан айлары аралығында еліміздің аймақтарында 14 облыстық турнир өткізіліп, үздік командалар республикалық турнирдің қатысушысы болады.
Серіктестік жобасы аясында 3 мыңнан астам ауыл баласын қамту көзделуде.
