«Ақша туралы әңгіме болды»: Су министрі Алтай Айнабекпен неге бірге жұмыс істемегенін түсіндірді
ҚР Су ресурстары және ирригация министрі Нұржан Нұржігітов өнертапқыш, қолдан жаңбыр жауғызу технологиясын Қазақстанға әкелген Алтай Айнабекпен неліктен бірге жұмыс істемегенін айтты, деп хабарлайды Azattyq Rýhy.
Әңгіме барысында 100-200 млн теңгенің айналасында сөз болған
Министрдің айтуынша, ол 2023 жылдың желтоқсан айында блогер Алтай Айнабекпен кездесіп, оның ұсынған технологиясымен танысқан.
«Біріншіден, айтылған 2 млрд 600 млн текше метр су — арнайы гидропосттардан өткен су. Суды өлшейтін арнайы құралдар бар. Бірақ сол судың Аралға жетуі үшін оны реттеу қажет, дұрыс бөлу керек. Сондықтан бұл — нақты дерекке негізделген көрсеткіш» — деді министр.
Министр кез келген жаңа технология немесе әдістеме ғылыми негізде дәлелденуі тиіс екенін атап өтті.
«Екіншіден, мен ол жігітпен таныспын (Алтай Айнабек). 2023 жылдың желтоқсан айында ол менің қабылдауымда болды. Өз жобасын таныстырды. Сол кезде мен оған: «Бірінші өз әдісіңді көрсет, дәлелде», — деп айттым. Жұмыс істелгеннен кейін біз: «Енді ғалымдарды қосайық», — дедік. Себебі әлеуметтік желіде «жаңбыр жауып жатыр, мен оны шақырдым» деп кез келген адам айта алады. Бірақ оны ғылыми түрде дәлелдеу керек. Сондықтан біз институттың ғалымдарын қосуға ұсыныс жасадық. Ғалымдар зерттеу жүргізсін дедік. Бірақ бұл жұмыс іске аспады. Ол қарсы болды деп айта алмаймын, бірақ бірге жұмыс істелмеді» — деді министр.
Министр Алтай Айнабек қанша қаржы сұрады деген сұраққа жауап берген.
«Ақша туралы да әңгіме болды. Бірақ біз бірінші кезекте ғылыми дәлелдемені талап еттік. Қазір нақты соманы есіме түсіре алмаймын, бірақ әңгіме 100-200 млн теңге көлеміндегі қаражат туралы болды» — деді Нұржан Нұржітов.
