«Анасы адвокат болғасын қорықтым»: Шәріп Серіктің бұрынғы жұбайы Say Mo да зорлық-зомбылық көргенін есіне алды
Танымал әнші Say Mo бұрынғы күйеуі Шәріп Серіктен зорлық-зомбылық көргенін есіне алды. Бұл туралы Stan.kz ақпарат агенттігі хабарлайды.
Айта кетейік, Шәріп Серіктің Say Mo-дан кейінгі қосылған жары Әлия Бутеева актердің лифтте шабуылдаған видеосын жариялаған еді. Осыған қатысты әнші де жеке парақшасында пікір білдірді.
“Шынымды айтсам, таңғалмаймын. Ол жігіттен бес жыл бұрын талай қорлық көрдім. Әлі күнге дейін терапияда жүрмін. Мен де сол кезде қолымда дәлел болмағасын тақырыпты қозғауға қорықтым. Себебі оның анасы – адвокат. Одан кейін бәрі мені кінәлады. Тіпті, кейбір таныстарым менен теріс айналды. Әлі есімде Алматыдағы Вавилон тұрғын үй кешенінің алдында қол көтерді. Бірақ мен тұрғын үй кешенінің администрациясына хабарласып, бейнежазбаны ала алмадым. Сол түні әріқарай не болғанын айтып бастасам, қорқынышқа толы әңгіме болады”, – деп жазды әнші.
Сондай-ақ өнер иесі “өзі күйеуінің көзіне шөп салған” деген қауесет туралы да айтып берді.
“Екеуміз екі жаққа кетіп жатқанда, “ол қол көтеретін жігіт емес, қыздың өзі көзіне шөп салған” деп мені қаралады. Соңында не болғанын бәріміз көрдік. Қыздар, бірдеңені анық түсінуіміз керек: Абьюзер адам ешқашан өзінен кінә іздемейді. Өздерін керемет адам деп есептейді. Одан кейін аналары да олар үшін ең керемет жан”, – деп жазды өнер иесі.
Еске салайық, Шәріп Серік анасы мен Say Mо арасындағы жанжалдың неден басталғанын айтып, микроинсульт алғанын жасырмаған еді.
