Алматыда ірі қойма өртеніп кетті
Алматы қаласының Жетісу ауданында ірі қойма өрті тіркеліп, қазіргі уақытта оны сөндіру жұмысы жалғасып жатыр. Бұл туралы ҚР Төтенше жағдайлар министрлігінің баспасөз қызметіне сілтеме жасап Azattyq Rýhy хабарлады.
Өрт толық ғимаратты шарпыған
Өрт Тобаяқов көшесінде орналасқан қоймада шыққан. Төтенше жағдайлар қызметінің алғашқы бөлімшелері келген сәтте ғимарат толығымен отқа оранғаны анықталған.
Қауіп деңгейі жоғары болғандықтан, өрт жоғары дәрежелі қиындық санатына жатқызылды.
Қаза тапқандар мен зардап шеккендер жоқ
Қазіргі уақытқа дейін 112 нөміріне зардап шеккендер туралы ақпарат түспеген.
Жедел штаб құрылды, барлық қызмет жұмылдырылды
Өрт сөндіру жұмысын Алматы қаласы ТЖД бастығы жеке өзі басқарып отыр. Жағдайды үйлестіру үшін жедел штаб құрылды.
Қаланың барлық жедел қызметтері жұмылдырылған. Жұмыс үш бағытта жүргізіліп жатыр.
«Тілсіз жауды сөндіруді қоймадағы жанғыш заттардың көптігі мен жоғары жылу сәулесі қиындатып отыр», – делінген ТЖМ хабарламасында.
68 қызметкер, 23 техника жұмылдырылды
Оқиға орнында 68 қызметкер, 23 арнайы техника, бірнеше сумен жабдықтау жүйесі үздіксіз жұмыс істеп тұр.
Өрт сөндірушілер құрылымдарды бөлшектеу мен сумен сөндіру жұмыстарын жалғастыруда.
Өрт локализацияланды
Соңғы мәліметтерге сәйкес, өрт толықтай оқшауланған. Қазір құтқарушылар қалдықтарды суару және ғимарат конструкцияларын бөлшектеу жұмысын жүргізіп жатыр.
