Алматыда 20 жастағы келіншек алтыншы қабаттан секіріп кеткен: тың деректер белгілі болды

Алматыда алтыншы қабаттан құлап қайтыс болған 20 жастағы келіншектің өліміне қатысты тың деректер белгілі болды, деп хабарлайды Ulysmedia.kz.
КТК телеарнасының мәліметінше, Ажар Тәуекелқызы балконнан секіріп кеткен. Бұл ресми мәлімет. Алайда марқұмның жақындары мұнымен келіспейді. Қыздарының өліміне олар ішімдікке салынып кеткен күйеу баласы мен құдағиын кінәләйды. Тіпті сол күні де мас келген күйеуі «терезеден итеріп жіберген» деп отыр.
ОҚИҒА ТУРАЛЫ
Қайғылы оқиға 9 наурызда «Асыл арман» тұрғын үй кешенінде болды. Ажар Тәуекелқызы жерге түскен сәтте айналадағы тұрғандар лезде көмекке ұмтылғанымен, құтқарып қала алмаған. Келіншек бірден жан тапсырған. Марқұмның биіктен құлаған сәтін көршілері көріп, видео түсіріп алған. Бір күн бұрын, яғни 8 наурызда тура сол пәтерден айқай-шу естіген.
— Бір зат түскендей дүрс ете қалды. Қызым жүгіріп барып қараса, бір қыз жатыр, бюстгалтер, трикомен. Өліп қалған. Біз жедел дәрдем шақыр деп айқайладық. Сол кезде бір ер кісінің дауысы шықты, жылаған. Бір күн бұрын түнде айқай-шу, қонақтар болды. Боқтады бір-бірін, арақ ішкен. Бізге сондай дыбыс естілді, дейді көршісі Тасбике Тұрымтаева.
ЖАҚЫНДАРЫ НЕ ДЕЙДІ
Ажардың өліміне қатысты бір аптадан бері 105-бап, яғни өзін-өзі өлтіруге дейін жеткізу бойынша тергеу жүріп жатыр. Бірақ марқұмның жақындары «өзі секіріп кетті» деген нұсқамен келіспейді. Себебі, мәйітті көрген кезде жағасын ұстап шошыған. Сол күні пәтерде күйеуі мен енесінен бөлек, тағы екі адамның болғанына сенімді. Тойлап, ішіп, араларында жанжал шығып, арты төбелеске ұласқан дейді әкесі.
— Кішкентай немеремнің киімін алуға қарындасым кірген. Қараса, қан, тіс жатқан. Кәдімгі үш түбірі бар тіс көрдім дейді. Балконнан төрге дейін аққан қанның ізі бар, дейді марқұмның әкесі Тәуекел Жекебай.
Марқұмның туысы Ақшабек Жекебайдың сөзінше, Ажардың екі аяғы тілінген, иығы көгеріп кеткен.
— Қолы көгерген. Басының артына сүйегі кіріп кеткен. Ал түскенде, жанымен түскен. «Асыл арманның» чатында балконнан екі адам төмен қарап тұрған. Сол видеоның бәрін өшіріп тастап отыр. Естуімше, жанындағы баланың ағасы опердің бастығы ма, Қаскелеңнің. Сол команда берген. Бәрі бір-бірін таниды, дейді туысы.
ПОЛИЦИЯ НЕ ДЕЙДІ
Қайғылы оқиғаға қатысты қазір полицейлер тергеу жүргізіп жатыр.
— Аталған факті бойынша полиция қылмыстық іс тіркеді. Оқиғаның себептері мен мән-жайын анықтау үшін қажетті тергеу әрекеттері жүргізілуде. Тергеу мүддесіне орай өзге ақпарат жария етілмейді, дейді Алматы облысы ПД ресми өкілі Меруерт Морякова.
Марқұм Абай атындағы Қазақ ұлттық педагогикалық университетінде үшінші курста оқыпты. Қазақ тілінің мұғалімі боламын деп армандаған. Артында бір бір жастан асқан ұл қалды. Бала енді нағашыларының қолында өседі. Өйткені әкелерінің құжаты да болмай, кезінде бала нағашы атасының атына жазылған екен.