Қазақстан Республикасы Тоғызқұмалақ спорты федерациясы басшылығында өзгерістер болды

20.01.2025

Қазақстан Республикасы Тоғызқұмалақ спорты федерациясының президенті болып Әкім Тұрсұн сайланды. Ал бұған дейін республикалық федерацияны басқарған қоғам қайраткері Алихан Байменов ұйымның Құрметті президенті болып бекітілді. Сонымен бірге Алихан Байменов Дүниежүзілік тоғызқұмалақ федерациясы президенті қызметін жалғастырады.

Астанада өткен республикалық федерацияның жиынында Алихан Байменов осы күнге дейін ҚР Тоғызқұмалақ спорты федерациясы вице-президенті қызметін атқарған Әкім Тұрсұнды федерация басшысы қызметіне ұсынды. Отырысқа қатысқан өңірлік федерация жетекшілері, тоғызқұмалақ қайраткерлері және федерация басшылық құрамы ұсынысты қолдап, Тұрсұнды ҚР Тоғызқұмалақ спорты федерациясы президенті лауазымына сайлады.

Айта кету керек, Алихан Байменов республикалық федерацияны 2004-2025 жылдар аралығында басқарды. Сондай-ақ бұл басқосуда республикалық федерацияның вице-президенттері лауазымына Батырбек Құлекеев, Шолпан Қадырова, Мақсат Шотаев, Дәулет Әбдікәрімов сайланды. Мақсат Шотаев вице-президенттікпен бірге Дүниежүзілік тоғызқұмалақ федерациясында бас хатшы қызметін атқарады. Федерацияның құрметті президенті, президент, вице-президент және бас хатшы қызметтері — қоғамдық негіздегі жұмыс. Ал ҚР Тоғызқұмалақ спорты федерациясы PR директоры лауазымына журналист Ришат Асқарбекұлы тағайындалды.

Отырыс барысында Дүниежүзілік тоғызқұмалақ федерациясының президенті Алихан Байменов жиналғандарға 2024 жылы атқарылған жұмыстар мен шаралардың есебі бойынша ақпарат берді. Өткен жыл ұлттық зияткерлік ойынның ерекше даму жылы болғанын және 5-ші Дүниежүзілік көшпенділер ойыны елдегі тарихи оқиғалардың бірі екенін атап өтті. Бұл жылы дәстүрлі жүздеген шарамен қатар тың және ірі жаңалықтар мол болды (қосымшада берілген-авт.)

Бұл шаралар Дүниежүзілік және ҚР Тоғызқұмалақ спорты федерациясы мен өңірлердегі тоғызқұмалақ федерацияларының, ҚР Туризм және спорт министрлігінің, Оқу-ағарту министрлігінің, Спортты қолдау қорының және жергілікті әкімдіктердің, спорт басқармаларының тығыз әріптестігімен тоғызқұмалақ жанашырлары, демеуші кәсіпкерлердің қолдауы арқасында жүзеге асырылды.

Қосымша ақпарат:

2024 жылы тоғызқұмалақ әлемінде болған ерекше маңызды оқиғалар мен жаңа бастамалар.

2024 жылғы 2 ақпанда ҚР Тоғызқұмалақ спорты федерациясының Қамқоршылар кеңесі құрылды.

2024 жылғы 25 наурызда «Тоғызқұмалақ» әнінің тұсаукесері өтті. Сөзінің авторы: Қалқаман Сарин, әнінің авторы: Қайрат Баекенов.

2024 жылғы 21 мамырда V Дүниежүзілік көшпенділер ойындарын қолдау мақсатында «Елшілер арасында V-ші «The One Hotel Astana» достық кездесу мен Астана қаласы мықтылары арасындағы турнир өтті.

Таразда Ә. Ақшораев пен С. Тілеубаевты еске алуға арналған республикалық турнир өтіп, енді ол жыл сайын Федерация кубогы деңгейінде ұйымдастырылатын болды.

2024 жылғы 8 шілдеде Испанияның Мадрид қаласында Togyzqumalaq España клубы ашылды.

2024 жылғы 11-19 шілде аралығында Чехияның Пардубице қаласында тоғызқұмалақтан ерлер мен әйелдер арасында Әлем Кубогі өтті.

2024 жылғы 14 тамызда Астанада Ұлыбританияның Қазақстан Республикасындағы Төтенше және өкілетті елшісі – Кәти Лич ханым мен ҚР Тоғызқұмалақ спорты федерациясының президенті – Алихан Байменовтің қатысуымен елшілік қызметкерлеріне арналған тоғызқұмалақ курсының алғашқы сабағы өтті.

2024 жылғы 14-18 қазан аралығында Астана қаласында Ы. Алтынсарин атындағы «Бином» мектебінде 2-11 сынып оқушылары арасындағы Олимпиада өтті. Олимпиадаға Алматы қаласы, Ақмола облысы, Ақтөбе облысы, Атырау облысы, Павлодар облысы, Маңғыстау облысы, Жетісу облысы, Жамбыл облысы және Астана қаласынан 100 оқушы қатысты.

2024 жылғы 16 тамызда Түркістанның орталық алаңында ашық аспан астында ойнайтын мәрмәрдан жасалған тоғызқұмалақ тақталары орнатылып, «Тоғызқұмалақ аллеясы» ашылды.

2024 жылғы 23 тамызда Астанада тоғызқұмалақтан «Абай жүлдесі» республикалық турнирінің финалдық кезеңі өтті.

2024 жылғы 8-13 қыркүйек аралығында Астана қаласында V Дүниежүзілік көшпенділер ойындары өтті. Жарысқа 41 мемлекеттен 114 спортшы қатысты.

2024 жылғы 9 қыркүйекте V Дүниежүзілік Көшпенділер ойынының аясында тоғызқұмалақтан республика бойынша бір мезетте 213 478 адамды онлайн қатыстырып, Қазақстан рекордтар кітабына (КИнЭС) енгізілді.

2024 жылғы 11 қыркүйекте Астана қаласы әкімдігінің қолдауымен «Хан Шатыр» саябағында 41 ел өкілінің қатысуымен «Тоғызқұмалақшылар аллеясында» ағаш отырғызу шарасы өтті.

2024 жылғы 17 қыркүйекте Бурабайда Біріккен Ұлттар Ұйымы қызметкерлері үшін шеберлік сабақ өткізілдіү

2024 жылғы 26-29 қыркүйек аралығында Румынияның Константа қаласында 19 жасқа дейінгі жастар арасындағы Әлем кубогі өтті.

2024 жылғы 28 қыркүйекте Оңтүстік Кореяның Сеул қаласында «Дүниежүзілік Тоғызқұмалақ Федерациясы» және «O’Brain and Matematic Academy» арасында меморандумға қол қойылды.ы

2024 жылғы 4-8 қазан аралығында Орал қаласында ардагерлер арасындағы Қазақстан Республикасының чемпионаты өтті.

2024 жылғы 14-18 қазан аралығында тоғызқұмалақтан 2-11 сынып оқушылары арасында олимпиада өтті.

2024 жылғы 22-24 қазан аралығында Астана қаласында Республика күніне арналған тоғызқұмалақтан «Қазақстан зияткері» республикалық турнирі өтті. Жарысқа 5 ҚР ЕССШ, 22 ҚР ХДСШ, 33 ҚР СШ, 26 ҚР СШҮ қатысты. Жарыстың жалпы жүлде қоры 25 миллион теңгені құрады.

2024 жылғы 9-16 қараша аралығында Түркияның Анкара қаласында VIІ Әлем чемпионаты өтті.

2024 жылғы 10-19 қараша аралығында Моңғолияның Ұлан-Батыр қаласында 13, 15, 17 жасқа дейінгі ұлдар мен қыздар арасында халықаралық жарыс өтті.

2024 жылғы 15 қарашада жасөспірімдер арасындағы Қатардың ашық чемпионаты өтті. Барлығы 14 адам қатысты.

2024 жылғы 22-30 қараша аралығында Колумбияның Кали қаласында халықаралық турнир өтті. Жарысқа Колумбия, Бразилия, Мексика, Эквадор, Аргентина, Чили, Гватемала, Панама, Венесуэла, Қазақстан елдерінен 50 жуық спортшы қатысты.

2024 жылғы 24 қарашада Колумбияның Кали қаласында «Латын Америкасының Тоғызқұмалақ Федерациясы» құрылды. Колумбия, Бразилия, Мексика, Эквадор, Аргентина, Чили, Гватемала, Панама, Венесуэла елдері мүше болуға ниет білдіріп, Федерация Президенті — Oscar Fajardo, Бас хатшысы — German Gonzalez сайланды.

2024 жылғы 1-5 желтоқсан аралығында Түркістан қаласында ересектер мен жастар арасындағы Азия Кубогі өтті

2024 жылғы 7 желтоқсанда Африканың Бенин елінде тоғызқұмалақ ойының шеберлік сабағы ұйымдастырылды.

2024 жылғы 10 желтоқсанда Африканың Нигерия елінде тоғызқұмалақ үйірмесі ашылды.

2024 жылғы 25-29 желтоқсан аралығында Өзбекстанның Нүкіс қаласында арасында халықаралық жарыс өтті.

2024 жылы желтоқсанда Катарда тұңғыш турнир өтті.

2024 жылы М. Шотаев (Өзбекстанда) пен Ә. Далиеваның (Колумбияда) басқа тілдерге аударылған кітаптары және де басқа да басылымдар жарыққа шықты.

2024 жылы алғаш рет «Тоғызқұмалақ» тақтасы Стратосфераға ұшырылды.

2024 жылы тұңғыш рет тоғызқұмалақ қайраткерлері: «Ерең еңбегі үшін» медалімен — 8 спортшы, 3 жаттықтырушы және «Құрмет» грамотасын — 1 спортшы марапатталды.

ҚР Мәжілісі кейбір депутаттарының солақай бастамасына (тоғызқұмалақ атауын өзгерту туралы) федерацияның ұстанымы туралы, ҚР Тоғызқұмалақ спорты федерация президентінің хаты жарияланды және оған негізделген Үкіметтің депутаттарға жауабы берілді.

Астана қаласы әкімдігінің қолдауымен арнайы болашақта тоғызқұмалақ отауы болатын бөлмесі берілді.

Сонымен қатар, «Tary Cup» жарысы өтті, микрокредиттік ұйымдармен келісім-шарт жасалды, Түркістан қаласындағы көшеде ойнатылатын тоғызқұмалақ тақталары орнатылды, күзде Алматы қаласында Біріккен Ұлттар ұйымының Даму бағдарламасы Орталық Азия мемлекеттері жастарына арналған үлкен жиында тоғызқұмалақтан шеберлік сабақтар өткізілді және тоғызқұмалақ тақталары таратылды, Ұлттық ғылыми-практикалық дене шынықтыру орталығымен келісім жасалды, Мемлекеттік қызметкерлер арасында және Іскі істер министрлігі қызметкерлері арасында республикалық жарыс және басқа да шаралар өтті.

2025 жылғы 8 қаңтардағы ақпаратқа сәйкес www.iggamecenter.com сайтында тоғызқұмалақты онлайн 100-ден астам елден 28 мыңнан астам спортшы 440 мыңнан астам партия ойнады, оның 13 796 ойыны тең аяқталды. www.playok.com сайтында күнделікті онлайн форматта 1000 астам партия ойналып, ойыншылар шеберліктерін арттырып жаттығу өткізіп тұрады.

Қазақстандағы тоғызқұмалақ туралы статистика: