Семейде тұрғын үйде лифт құлап, алты адам зардап шекті
Семейде көпқабатты үйлердің бірінде алты адам мінген лифт шахтаға құлап кетті. Бұл туралы Stan.kz ақпарат агенттігі хабарлайды.
Қала әкімдігінің дерегіне сүйенсек, лифт мінген адамдарды көтере алмай құлап, 6 адам да зардап шекті.
“Сағат 11:40 шамасында лифтке алты адам кіргені анықталды. Рұқсат етілген шекті салмақтан асып кеткендіктен, лифт кабельдері ұстап тұра алмай, кабина шахтаға құлап кетті”, – деді Семей әкімдігінің баспасөз қызметі.
Қазір зардап шеккендер ауруханаға жеткізіліп, оларға медициналық көмек көрсетілді. Оқиғадан қаза тапқандар жоқ. Қала әкімі қылмыстық іс қозғап, тергеу жүргізіліп жатыр.
Абай облыстық полиция департаменті лифт құлауына байланысты адамдардың жарақаттануы фактісі бойынша сотқа дейінгі тергеу басталғанын нақтылады. Сонымен қатар қалада мессенджерлер арқылы аудио хабарлама тарағаны, онда зардап шеккендердің бірі қайтыс болғаны айтылады. Алайда полиция департаменті бұл ақпаратты жоққа шығарды.
“Қазір ауруханаларда алты зардап шеккен адам бар. Лифтте қаза тапқандарға қатысты WhatsApp чаттарында тараған ақпарат шындыққа жанаспайды”, – делінген полиция хабарламасында.
Айта кетейік, желтоқсан айында жергілікті агенттіктер ұлттық лифт қауымдастығына сілтеме жасап, елдегі әр бесінші лифт ауыстыруды немесе жөндеуді қажет ететінін мәлімдеді. Полицейлер жалған ақпарат таратқаны үшін жауапкершілік қарастырылғанын ескертеді және азаматтарды тек ресми дереккөздерге сенуге шақырады.
Еске салайық, былтыр Атырау облысындағы емдеу мекемесінде лифт істен шығып, ішінде ата-атаналар балаларымен бірге қалып қойғаны туралы жаздық.
