Шымкентте 13 мыңға жуық адам жүргізуші куәлігіне емтихан тапсыра алмаған
Жыл сайын жүргізуші куәлігіне сұраныс артып келеді
«Азаматтарға арналған үкімет» мемлекеттік корпорациясының Шымкенттегі филиалы ЖЖЕ 3.0 жаңа жүйесін енгізе отырып, теориялық емтихан тапсыру қиындай түскенін атап өтті. Осылайша, қазан айынан бері 40-қа жуық тест нәтижесі жойылған, деп хабарлайды Azattyq Ruhy агенттігі Оtyrar-ға сілтеме жасап.
Аталған жүйе емтихан тапсырушының емтихан кезіндегі іс-қимылын және тестілеу үдерісінің аудио және бейне жазбаларын жасауға мүмкіндік берді. Емтихан тапсыру кезінде клиент биометриялық деректер бойынша сәйкестендіріледі. Бұл бөгде адамдардың емтиханға кіруіне тосқауыл болады. Мәселен, биыл 11 айда 40 мыңға жуық шымкенттік жүргізуші куәлігін алуға өтініш білдірген. Оның 23 мыңы емтиханды сәтті тапсыра алса, 13 мыңға жуық адам теориялық емтиханнан өте алмады.
«Жыл сайын жүргізуші куәлігіне сұраныс артып келеді. Сондықтан біз бұл процесті барынша ашық етуге мүдделіміз. Мамандандырылған ХҚКО арқылы жылына 300 мың қызмет көрсетеміз. Ал жүргізуші куәлікке келсек, оны 83 мыңға жуық шымкенттік жүргізуші куәлігін алуға және мерзімі аяқталуына байланысты ауыстыруға өтініш тапсырған», – деді Шымкент қаласы бойынша мемлекеттік корпорация филиалы директорының орынбасары Аманжол Мәди.
Еске салсақ, үміткер жүргізуші куәлігін алғаш рет алу үшін екі емтихан тапсыруы керек. Олар: теориялық және практикалық. Бүгінгі таңда Шымкент қаласында үш мамандандырылған ХҚКО жұмыс істейді. Олардың екеуінде автодром бар.
